ന്യൂഡൽഹി: എട്ടാം ക്ലാസ് പാഠപുസ്തക വിവാദത്തിൽ സുപ്രീംകോടതി ഇടപെടലിനു പിന്നാലെ പാഠ്യപദ്ധതി സമിതി പുനഃസംഘടിപ്പിച്ച് എൻസിഇആർടി.
നിലവിലുണ്ടായിരുന്ന 22 അംഗ സമിതിക്കു പകരമായി 20 അംഗങ്ങളുള്ള നാഷണൽ സിലബസ് ആൻഡ് ടീച്ചിഗ് ലേണിംഗ് മെറ്റീരിയൽ കമ്മിറ്റി (എൻഎസ്ടിസി) എൻസിഇആർടി രൂപീകരിച്ചു.
ഐഐടി മദ്രാസ് ഡയറക്ടർ വി. കാമകോടി, ഐസിഎച്ച്ആർ ചെയർമാൻ രാഘവേന്ദ്ര തൻവാർ തുടങ്ങിയ പ്രമുഖർ പുതിയ സമിതിയിലുണ്ട്. സുപ്രീംകോടതി ഉത്തരവിനെത്തുടർന്ന് മിഷേൽ ഡാനിനോ, എം.ഡി. ശ്രീനിവാസ് തുടങ്ങിയവരെ സമിതിയിൽനിന്നു നീക്കം ചെയ്തു.
സിലബസ് കൂടുതൽ കാര്യക്ഷമമാക്കുന്നതിനും ആവശ്യമായ മാറ്റങ്ങൾ വരുത്തുന്നതിനുമാണ് സമിതി പുനഃസംഘടിപ്പിച്ചതെന്ന് എൻസിഇആർടി അറിയിച്ചു. മൂന്നു മുതൽ 12 വരെയുള്ള ക്ലാസുകളിലെ പാഠ്യപദ്ധതിയും പുസ്തകങ്ങളും തയാറാക്കാനും ഒന്ന്, രണ്ട് ക്ലാസുകളിലെ പുസ്തകങ്ങളിൽ ആവശ്യമായ പരിഷ്കാരങ്ങൾ വരുത്താനും ഈ സമിതിക്ക് അധികാരമുണ്ട്.